ಕನ್ನಡದ ಒಳಗುಟ್ಟು ೧ – ಊ, ಮತ್ತು, ಹಾಗು

ನನಗೆ ಹೊಳೆದ ಕೆಲವು ಕನ್ನಡದ್ದೇ ಆದ, ಕನ್ನಡ ನುಡಿಯ ನಿಬ್ಬರದ ಸಂಗತಿಗಳನ್ನು ಬರೆಯುತ್ತಿದ್ದೀನಿ…

ಕನ್ನಡದ ಈ ಹಾಡನ್ನು ಗಮನಿಸೋಣ.

ಇಲ್ಲಿ ಮೊದಲ ಸಾಲನ್ನು ನಾವು ಆಡುನುಡಿಯಲ್ಲಿ ಹೇಳಿದ್ರೆ ಹೀಗೆ ಹೇಳ್ತೀವಿ “ಕಣ್ಣೂ ಕಣ್ಣೂ ಕಲೆತಾಗ” ಎಂದು. ಅಂದ್ರೇನು? ಒಂದು ಕಣ್ಣು ಮತ್ತು ಮತ್ತೊಂದು ಕಣ್ಣು ಕಲೆತಾಗ ಎಂದು. ಇಲ್ಲಿ ಗಮನಿಸಬೇಕಾದ ಸಂಗತಿ ಕಣ್ಣೂ ಕಣ್ಣೂ ಎಂದು ಬರುವ ಊ ಹಿನ್ನೊಟ್ಟು.

ಕನ್ನಡದಲ್ಲಿ And, ಮತ್ತು, ಹಾಗು ಎಂದು ತಿಳಿಸಲು ಈ ಹಿನ್ನೊಟ್ಟನ್ನೇ ನಾವು ಹೆಚ್ಚುಗೆ ಬಳಸೋದು. ಮತ್ತು, ಹಾಗು ಆಡುನುಡಿಯಲ್ಲಿ ಕಡಮೆ ಬಳಕೆಯಲ್ಲಿವೆ ಎಂದು ನನಗೆ ಅನ್ನಿಸ್ತದೆ.

“ನಾನೂ ಅಂಗಡಿಗೆ ಹೋಗಿ ಉಪ್ಪನ್ನೂ, ಸಕ್ರೇನೂ, ತರಕಾರೀನೂ ತಗೊಂಡ್ ಬಂದೆ”
“ಅವನು ರಮಾನ್ನೂ, ಸೀತಾನ್ನೂ, ಗೋಪೀನ್ನೂ ಕರೆಕೊಂಡು ಹೋದ”
“ಅಮ್ಮ ರೊಟ್ಟೀನೂ, ಚಟ್ನೀನೂ ಮಾಡಿದ್ಲು”
“ಅಮ್ಮನ್ನೂ, ಅಪ್ಪನ್ನೂ ಊಟಕ್ ಕರಿಯೋ”

ಇಲ್ಲಿ ಇನ್ನೊಂದು ಗಮನಿಸಬೇಕು. ಈ ’ಮತ್ತು’ ಎಂದು ತಿಳಿಸುವ ಸರಕುಗಳಿಗೆಲ್ಲ ಈ ’ಊ’ ಹಿನ್ನೊಟ್ಟು ಬರುವುದು.. ಅಂದ್ರೆ ಪಟ್ಟಿ ಮಾಡುವ ಅಶ್ಟೂ ಸರಕುಗಳಿಗೂ ಈ ಹಿನ್ನೊಟ್ಟು ಹಾಕುವುದು ಕನ್ನಡದ ಬಗೆ.

ಇದನ್ನು ಮಾತನಾಡುವಾಗ ಗಮನಿಸಿದರೆ..

’ನಾನೂ ನೀನೂ ಸಿನಿಮಕ್ಕೆ ಹೋಗೋಣ’ ಎಂಬ ಸಾಲನ್ನು ತೆಗೆದುಕೊಳ್ಳೋಣ.

’ನಾನೂ’ ಎಂದು ’ಊ’ ಎಂದು ಎಳೆದು ಹೇಳಿದಾಗ, ಕೇಳುಗನಿಗೆ ’ನಾನು’ ಎಂಬುದರ ಜತೆಗೆ ಮತ್ತೊಂದು ಸೇರಲಿಗೆ ಎಂಬ ಸುಳಿವು ಸಿಕ್ಕಿರುತ್ತದೆ.